- As listas xa se poden consultar na web do Instituto Galego de Vivenda e Solo (IGVS) ou na do Consorcio Casco Vello de Vigo (CCVV).
- Un total de 110 solicitantes participaron no procedemento, que agora abre un prazo de reclamacións para, despois, publicar a lista definitiva de admitidos e proceder ao sorteo das vivendas, que será público e ante notario, e se estima para as primeiras semanas do mes de xullo.
- As 18 novas vivendas de protección autonómica (VPA) rehabilitadas polo CCVV se atopan nas rúas San Sebastián, Ferraría e Hortas, teñen entre 1 e 3 dormitorios e uns prezos que oscilan entre 77.139,08 euros e 193.158,11 euros.
Vigo, 4 de xuño de 2012.- A Consellería de Medio Ambiente, Territorio e Infraestruturas, a través do Instituto Galego da Vivenda e Solo (IGVS), publica hoxe as listas provisionais de admitidos e excluídos para o procedemento de adxudicación de 18 novas vivendas de protección autonómica (VPA) de réxime concertado rehabilitadas polo Consorcio Casco Vello de Vigo (CCVV) -participado nun 90% pola Xunta de Galicia e no 10% restante polo Concello de Vigo- e que se atopan nas rúas San Sebastián, Ferraría e Hortas, todas elas na parte alta do barrio antigo da cidade.
As listas provisionais de admitidos e excluídos, con indicación da causa da exclusión, xa se poden consultar a través da web do IGVS: http://www.igvs.es/web/igvs/15 e tamén a través da páxina web do CCVV (www.consorciocascovellovigo.org).
A partires de agora, ábrese un prazo de reclamacións para que os interesados poidan presentar os requirimentos que consideren oportunos e, unha vez resoltos, no prazo máximo de 10 días, se aprobarán as listas definitivas de admitidos, que serán debidamente publicadas. Posteriormente, realizarase o sorteo, público e ante notario, entre todos aqueles solicitantes que figuren na lista definitiva para coñecer así aos adxudicatarios definitivos das vivendas. Segundo os prazos establecidos, estímase que o sorteo poida celebrarse nas primeiras semanas do mes de xullo.
Tras publicar o Instituto Galego de Vivenda e Solo a resolución pola que se daba inicio ao procedemento o pasado 26 de abril, foron 110 as persoas que, no prazo establecido, decidiron inscribirse neste novo procedemento de adxudicación de vivendas de protección autonómica que oferta o CCVV e que supón poñer en marcha unha terceira fase de adxudicación de vivendas en réxime de compravenda por parte do Consorcio, presidido pola delegada territorial da Administración autonómica na cidade, María José Bravo Bosch.
Os 18 pisos que se atopan nas rúas San Sebastián, Ferraría e Hortas, teñen entre 1 e 3 dormitorios e uns prezos que oscilan entre 77.139,08 euros e 193.158,11 euros. Nesta terceira fase de vivendas en réxime de compravenda que o CCVV pon no mercado, é a primeira vez que existen pisos de 3 habitacións.
As 18 VPA están nestes momentos en plena execución das súas obras e estímase que estean rematadas durante o período estival. Son as seguintes:
– Ferraría 11-13-15-San Sebastián 1- 3-5-7:
9 vivendas: 4 dun dormitorio, 3 de 2 dormitorios e 2 de 3 dormitorios. As superficies van dende os 56,60 m2 e 108,90 m2 e os prezos oscilan entre 100.392,55 euros e 193.158,11 euros.
– Hortas 10-12:
5 vivendas: 3 de 2 dormitorios e 2 dun dormitorio. As superficies van dende os 66,67 m2 e 107,89 m2 e os prezos oscilan entre 118.253,91 euros e 191.366,65 euros.
– San Sebastián 8-12-14:
4 vivendas: 2 dun dormitorio+rocho e 2 de 2 dormitorios+rocho. As superficies van dende os 43,49 m2 e os 75,52 m2 e os prezos oscilan entre os 77.139,08 euros e os 133.951,33 euros.
As vivendas adxudícanse a través do Rexistro Único de Demandantes de Vivenda da Xunta de Galicia e optan ás mesmas os inscritos en dito rexistro no Concello de Vigo e no réxime de Vivenda de Promoción Privada de Réxime Concertado, no apartado de compra.
Facebook