Os emprendedores do Casco Vello, parte esencial da revitalización do barrio (parte 1 de 2)

O Consorcio Casco Vello de Vigo foi creado no 2005 cun obxectivo claro: atender as demandas dos veciños do centro histórico, que viñan reclamando un ambicioso programa de rehabilitación e recuperación urbana na área. Esta recuperación entendeuse e executouse nunha dobre vertente: por un lado, os inmobles que traerían a novas familias a vivir ao barrio; polo outro, os locais comerciais nos que se poderían instalar novos emprendedores.

De feito, foron moitos os que decidiron apostar pola dinamización do Casco Vello de Vigo e se trasladaron ou abriron os seus negocios nos locais rehabilitados polo Consorcio para tal fin. Sobre eles poderedes coñecer máis na sección Personaxes deste mesmo blog, na que un a un imos entrevistándoos a todos.

Abeleira Menéndez é unha das rúas que conta con máis actividade empresarial: desde fotografía a un bazar de produtos naturais, todo ten cabida no Casco Vello. Comezamos no número 11, onde Montserrat Freire rexenta A Tenda do Avó desde hai máis de dous anos. Produtos galegos, artesáns e ecolóxicos distinguen esta tenda de tódalas demais. E é que poderás atopar desde marmeladas de mel ata algas, pasando por froitas e verduras, produtos que poderás elixir para incluír nunha cesta de agasallo, outro dos servizos que teñen dispoñibles.

Ao seu carón sitúase outra tenda, A Horta de Abeleira, con alimentos 100% ecolóxicos e frescos. Ofrecen, polo tanto, mercancía natural de primeira calidade, sen aditivos nin conservantes, e moito menos pesticidas. Se queredes probar algúns destes produtos saudables, achegádevos ao 13-15, atenderanvos encantadas.

Ademais destas dúas tendas, outros profesionais decidiron levar o seu negocio a Abeleira Menéndez. Proba disto é o fotógrafo Javier Teniente, quen montou a súa galería de arte no número 13. E é que, segundo as súas palabras, “a zona con máis encanto da cidade é o noso Casco Vello e, por iso, a miña galería de arte tiña que estar aquí”. Este ano cumpre tamén dous anos como veciño do barrio histórico .

E agora tócanos falar do bazar que revolucionou a restauración local. Matina, situada no número 26, especialízase en produtos naturais e panadería, pero o local en si é tamén unha gran galería de arte. Ademais de deleitarte cos seus almorzos, tamén poderás asistir aos obradoiros, conferencias ou exposicións que organizan e cos que dinamizan aínda máis a rúa en particular e o barrio en xeral.

Moi preto dela, concretamente no número 24, un aparellador abriu tamén no barrio histórico a súa propia oficina. E relacionado con este servizo, na rúa Ferraría atópase Cal Construcciones y Servicios, empresa de reformas e servizos integrais. Atoparédelos no número 31.

Un pouco antes, nos números 25, 27 e 29 veredes a Espacio Nido, un espazo de coworking que inaugurou o seu local no Casco Vello o 22 de febreiro deste mesmo ano. O novo baixo comercial ofrece as súas instalacións a emprendedores e a cidadanía en xeral que necesiten un espazo perfecto para eventos culturais, reunións e distintas iniciativas que encaixen na súa filosofía. Na actualidade, na sede de Espacio Nido, traballan programadores informáticos, deseñadores, publicistas, arquitectos ou ilustradores, entre outros profesionais.