Unha vez se terminen os traballos de rehabilitación das edificacións, as vivendas resultantes, ao estar calificadas como Vivendas de Protección Autonómica (VPA), outórganse a través do Rexistro Único de Demandantes de Vivenda. O Instituto Galego de Vivenda e Solo (IGVS) puxo en marcha catro sorteos para outorgar as 64 vivendas rehabilitadas ata o momento. Desas 64, máis de 50 están xa ocupadas por novas familias que apostaron polo novo barrio histórico. A maioría deses novos propietarios son mozos de entre 25 e 35 anos.
Pero a oferta de vivenda pública tamén incluiu vivendas en réxime de aluguer, que se adxudicaron así mesmo a través do IGVS. Foron 12 as Vivendas de Promoción Pública (VPP) sorteadas, e outras dúas serviron para realoxar a antigos inquilinos de edificios adquiridos para a súa posterior rehabilitación. O sorteo das vivendas realizouse entre mozos de 18 e 35 anos, cuns ingresos de entre 1 e 5,5 veces o IPREM.
Xunto coas vivendas, o CCVV tamén ofertou varios locais comerciais, co obxectivo de dinamizar a zona. Concretamente, foron 21 os rehabilitados, dos cales 19 foron destinados a novos emprendedores: 11 xa teñen actividade, outros 2 abrirán proximamente, 4 acaban de ser adxudicados e outros 2 seguen estando dispoñibles. Javier Teniente, Matina, A tenda do Avó, Vigo Remember ou Espacio Nido son algúns exemplos dos que xa vos falamos.
Pero, ademais de vivendas e locais comerciais, no afán de dinamización do Casco Vello, o Consorcio promove o establecemento de organismos e servizos administrativos no barrio histórico:
- Sede APEC: situada no número 16 da rúa Real.
- Traslado do Servizo Común de Notificacións e Embargos ubicado nos xulgados vigueses: a Xunta de Galicia adquiriu unha parcela do CCVV en San Sebastián, ademais dun local ubicado no número 24 de Abeleira Menéndez.
- Rexistros da Propiedade: trasladaranse aos números 29, 31 e 33 da rúa Real e ao 26 da Alta.
Xunto cos inmobles transmitidos ao Rexitro da Propiedade, foron outros tres os que se pasaron a diferentes institucións:
- Un á Xunta de Galicia para o Rexistro Civil (posteriormente decidiuse ocupalo coa Oficina de Notificacións e Embargos): San Sebastián, 13 + un local rehabilitado en Abeleira Menéndez, 24.
- Dous ao Concello de Vigo: Subida á Costa 4 e rúa Alta 18.
Todo este proceso desembocou na transformación dunha parte histórica e de gran importancia para a cidade. O cambio que se pedía desde hai algún tempo está xa sucedendo, cambio que foi recoñecido a través de varios premios: Premios Gran de Area de Arquitectura, Premio COAG de Arquitectura ou o premio recibido na XII BEAU.
O resultado é froito do traballo dun equipo e da implicación que todos tiveron no proxecto común de recuperación do barrio histórico de Vigo, sen esquecernos desas persoas que apostaron por construír a súa vida familiar e laboral no Casco Vello.