Nas próximas semanas finalizará a construción e incluirase nun próximo concurso a promoción do Consorcio Casco Vello de Vigo (CCVV) situada na rúa Subida a Costa, 5.
Os máis de douscentos mil euros de investimento que supuxo este proxecto permitirá rehabilitar un edificio, anteriormente con uso hostaleiro, para xerar unha vivenda situada en planta baixa e planta primeira e un local comercial en planta baixa e semisótano, cunha superficie total construída de 239,63 m2.
Aspecto dun momento da rehabilitación do edificio
A vivenda estará dotada con dous dormitorios, un baño, cociña-salón-comedor e lavadoiro-tendal. A fachada contará con balcóns á rúa Subida a Costa e na parte posterior de plánta soto existirá un pequeno patio interior. A parte traseira da vivenda, pola diferenza de cotas na zona, será especialmente asollada ao quedar sobreelevada en relación a moitas das edificacións situadas ao redor.
A actuación realízase nunha parcela cualificada como chan urbano consolidado dentro do PEPRI Casco Vello de Vigo. De acordo con esta cualificación consideráronse como elementos a protexer na execución do proxecto as fachadas de pedra do edificio, prohibíndose a alteración dos seus materiais e carpinterías exteriores. A licenza de obra foi concedida en xuño de 2016 e as obras iniciáronse a principios de 2017. Previamente demoleuse un anexo realizado no patio exterior do edificio considerado ilegal.
Subida á Costa 5 súmase ás varias rehabilitacións acometidas polo CCVV nesta zona que contribuíu a transformar toda esta parte do Casco Vello Alto, que pasou de ser unha zona totalmente degradada a converterse nun viario de ligazón peonil entre a zona do concello de Vigo e Paseo de Alfonso XII, con algunhas das mellores realizacións arquitectónicas executadas na nosa cidade na última década.
Facebook
Twitter