A zona alta do Casco Vello acolle o sábado unha nova edición da Verbena Market

Vigo, 8 de xuño do 2023.-  O Casco Vello de Vigo, en concreto a contorna da rúa San Sebastián e a praza do Abanico, na zona alta do barrio, acollerán o próximo  sábado 10 , entre as doce da mañá e as oito da tarde, unha nova edición do Verbena Market, o seu mercadillo itinerante de arte, deseño e artesanía que pretende contribuír á dinamización do barrio e á difusión de pequenas marcas e artesáns.

Organizada en colaboración entre a Asociación Cultural Barrio Alto do Casco Vello e a Asociación Évame-Oroza está previsto que nesta nova edición participen un total de 20 marcas e artesáns de distintas ramas do deseño e a moda, que instalarán os seus postos nas rúas citadas.

A actividade máis comercial compleméntase ademais cun programa de actividades de animación. Estás comezarán ás 12,30 co contacontos “Nerón, ou canciño que roda por Vigo” da man de Francesca López d’a Silva que actuará na planta superior de a  Asociación Évame-Oroza, situada na praza do Abánico. Á súa conclusión poderase participar nunha sesión vermú de pop e rock dos anos 90.

Xa pola tarde o programa de actividades continúa con Pauliña Fronkonstine , que na praza do Abánico, e a partir das catro, ofrecerá o seu Tarot espectáculo. Ás cinco terá lugar na Asociación Évame-Oroza un taller de cómic a cargo de María Vilar e  Iago Araujo, da escola Kame. Para estas dúas actividades é necesario anotarse previamente a través dos correos [email protected] e [email protected]. A actuación en acústico de Paul Clarke, a partir das cinco e media poñerá fin a este evento.