Vigo, 24 de marzo do 2023.- A “Vida Nova” de Dante será o eixo central do Dantedi, a actividade que “ladante Vigo”, en colaboración con varios organismos públicos, desenvolverá mañá, sábado 25, a partir das sete e media da tarde no Conservatorio Superior de Música de Vigo (rúa Manuel Olivié, 23).
A asociación Dante Alighieri é o organismo encargado da difusión en todo o mundo da cultura e o idioma italiano. O goberno italiano escolleu en 2020 o 25 de marzo como data dedicada á reivindicación do poeta Dante Alighieri, considerado como o pai da cultura e o idioma do país transalpino, por coincidir co inicio da viaxe que o poeta emprende polo Máis aló na “Divina Comedia”, a súa obra máis coñecida.
Na organización do acto que se desenvolverá mañá colaboran o xa citado Conservatorio Superior de Música de Vigo, a Escola Oficial de Idiomas, a Facultade de Filoloxía da USC e a Escola Superior de Arte Dramática de Galicia. A través dun espectáculo poético-musical, de produción totalmente galega, profundarase na figura de Dante Aligheiri e a súa primeira obra “Vita Nuova”.
En Vigo funciona desde hai varios anos un comité da organización Dante Alighieri que recentemente se instalou na rúa Santiago, nun local conseguido a través do concurso de alugueiros de locais comerciais posto en marcha polo Consorcio Casco Vello de Vigo.
Facebook
Twitter