Adxudicadas as obras da promoción Alta 8-14
Permitirán a próxima chegada á zona de cinco novas familias
O Comite Executivo do Consorcio Casco Vello de Vigo, reunido esta mañá baixo a presidencia de Ana Ortiz Alvarez, adxudicou as obras da súa promoción Alta 8-14 á empresa Omain Construcción Sostenible S.L. A obra, cun orzamento de execución de 1.427.958,87 euros, permitirá a creación de cinco novas vivendas, distribuídas en planta baixa e tres alturas, con superficies que van desde os 69 ata os 113 metros cadrados. Catro das novas vivendas contarán con tres dormitorios, unha con dúas e todas elas terán un rocho.
A edificación se levará a cabo segundo o proxecto presentado en xuño de 2025 polo arquitecto Francisco Javier Vázquez Fernández, e levantarase sobre a agrupación de catro pequenos solares adquiridos en 2022 polo CCVV. A superficie total construída do edificio será de 734 metros cadrados, aos que hai que sumar un patio de 39,30 metros cadrados.
As obras desta nova promoción, a primeira acometida polo Consorcio nesta rúa do Casco Vello Baixo, moi próxima á Porta do Sol, desenvolveranse ao longo deste ano e principios do próximo, prevéndose que ao longo do primeiro semestre de 2027 poidan acceder ás cinco novas vivendas as familias que resulten adxudicatarias das mesmas.
