A cultura italiana gana espazo en Vigo coa nova sede da Sociedade Dante Aligheiri no Casco Vello
Aínda que non son pouca cousa, Italia é algo máis que a pizza, o “gelato” ou as ruínas romanas. Así o entenderon en 1889 o grupo de intelectuais italianos que fundaron a Sociedade Dante Alighieri co obxectivo de «protexer e difundir a lingua e a cultura italiana no mundo e nutrir entre os estranxeiros o amor e o culto á civilización italiana». Desde entón a asociación expandiuse por todo o mundo a través dos denominados comités, organizacións independentes pero que se apoian nas directivas do seu matriz. Xa son máis de 500 distribuídos por todo o mundo e desde fai tres anos uno deles funciona en Vigo, desenvolvendo un meritorio esforzo por parte dos seus 90 socios – maioritariamente non italianos- para alcanzar o seu obxectivo.
Con todo, para dar maior impulso á súa actividade atopábanse cun problema: a falta dun local adecuado, cuestión que agora consideran superada ao acceder ao alugueiro do un dos baixos da promoción impulsada polo Consorcio Casco Vello de Vigo na rúa Santiago 15. “Aquí”, sinala a presidenta do Comité, Daniela Sarraíno, ”será máis fácil e asumible levar a cabo as nosas actividades e os socios dispoñerán dun punto de encontro cómodo para as nosas reunións ou para a lectura do fondo bibliográfico en italiano do que dispoñemos”. “Ademais, -continúa- “o apoio á difusión do italiano xa sexa nas nosas clases ou noutros centros, pero sempre a través dunha formación regrada e oficial, é unha parte importante do noso labor e o dispoñer dunha sede permanente abriranos as portas a programas de apoio de organismos públicos italianos para poder, por exemplo, contar con estudantes de filoloxía que desexen realizar prácticas como profesores fóra de Italia”. 
PLIDA
Daniela Sarraíno insiste ademais na importancia que supón, para Galicia en xeral e para Vigo en particular, o contar cunha sede da Sociedade Dante Aligheiri, xa que, en colaboración coa Escola Oficial de Idiomas, isto permite evitar desprazamentos para a realización dos exames PLIDA (Proxecto Lingua Italiana Dante Aligheiri), a única certificación con validez internacional de coñecemento do italiano.
A verdade é que parece difícil de entender como cos aparentemente poucos medios dos que dispón a asociación fose capaz de acometer un número tan amplo de actividades: concertos, recitais de poesía, presentacións de libros, xornadas de gastronomía e semanas de cinema figuran xa o seu historial. Sen dúbida inflúen niso a súa demostrada capacidade para lograr a colaboración de organismos públicos tanto locais como estatais e a entrega dos seus socios. E como para demostrar que aínda quedan forzas máis que suficientes a presidenta do comité vigués anuncia xa a posta en marcha de dúas novas iniciativas. A primeira, o 25 de marzo, será a celebración do Dia de Dante, que este ano se centrará na súa obra “A Vita Nuova”. A segunda, unha nova edición da semana do cinema italiano, que terá lugar en novembro.
