A Conselleira Vázquez Mejuto mostra o seu apoio á tarefa de rehabilitación do Consorcio Casco Vello

Vigo, 26 de noviembre de 2018.-  A conselleira de Medio Ambiente, Territorio e Vivenda , Angeles Vázquez Mejuto, destacou esta mañá, no transcurso dunha visita á zona histórica da Vigo, o labor rehabilitadora que leva a cabo o Consorcio Casco Vello de Vigo (CCVV). A conselleira, acompañada polo presidente do Consorcio e Delegado da Xunta de Galicia en Vigo, Ignacio López-Chaves, coñeceu de primeira man varias das vivendas e locais comerciais recuperados polo CCVV e reiterou o compromiso da Xunta de Galicia con esta tarefa, para a que existe xa unha planificación prevista ata o ano 2024 que persegue a creación de 50 novas vivendas e que supoñerán un investimento de 15,5 millóns de euros.

Vázquez Mejuto referiuse así mesmo ao empuxe que a intervención do CCVV –organismo integrado nun 90 por cento pola Xunta de Galicia e nun 10 por cento polo Concello de Vigo- tivo sobre outros axentes empresariais e sociais á hora de abordar a recuperación deste outrora degradado barrio e destacou que estes últimos meses foron de boas noticias neste sentido ao concretarse varios novos investimentos, entre eles a recente adquisición dun solar de gran superficie na zona do Berbés no que está prevista a construción de seis novas vivendas e dous locais comerciais.

Nunha rolda de prensa cos medios de comunicación celebrada ás portas dunha das últimas rehabilitacións abordadas polo Consorcio, Ferrería 8, a conselleira destacou así mesmo outra serie de iniciativas do goberno galego para impulsar a actividade do sector da construción en Vigo, como a aprobación da redacción das bases do concurso de urbanización do polígono de San Paio de Navia ou a posta en marcha de varias Áreas de Rehabilitación Integral.

Ocupación

 Unha boa parte da visita da responsable do departamento de Vivenda da Xunta de Galicia estivo dedicada a coñecer as dúas próximas promocións que o Consorcio Casco Vello de Vigo poñerá proximamente a disposición do Instituto Galego de Vivenda e Solo para a súa venda como Vivendas de Protección. Os arquitectos responsables de ambos os proxectos –Ferrería 8 e Cruz Verde 8– e o persoal técnico do Consorcio explicaron á conselleira os pormenores destas obras incidindo nos criterios seguidos á hora de expor estas recuperacións, así como nos condicionantes a que ven sometidos pola inclusión das mesmas no ámbito dun Plan de Rehabilitación e Protección Integral (PEPRI). Vázquez Mejuto interesouse especialmente polo perfil dos solicitantes das vivendas promovidas polo CCVV, e celebrou o feito de que a maior parte das máis de 100 vivendas xa recuperadas estean xa vendidas ou alugadas.